開刀正常黎講係下腹 恥骨上兩隻手指左右既位置打橫開。麻醉方法多數係半身麻醉，個人係有知覺下開刀。特別情況先會全身麻醉。手術會切開皮膚、脂肪、肌肉、膜、子宮、胎盤 然後將BB拎出黎。再逐層去補返個傷口。針線同縫補手法每間醫院都唔同。如果需要拆線 一般係術後5-7日拆。術後一般需要禁水禁食一天然後先慢慢由流質食起。多數媽媽第二三日先可勉強行動。
順產就係需要經過一段時間既規律陣痛，等子宮頸打開曬十度先可以生產。生BB感覺等於痾屎咁，係要痾BB出黎。至於要痛幾耐，每個人都好唔同。較年輕，盤骨夠寬，有過順產經驗，BB較細粒多數會生得快d。需要的話會剪開陰道口幫BB出世。剪開左會幫你補返。如果無辦法靠自己力量BB出黎，咁就會用吸盤或產鉗幫BB出世。順產既媽媽產後基本上都可即時行動。
咁到底邊樣好啲呢。其實就冇絕對，視乎個人情況。順產對BB個肺功能有幫助。至於忍受唔到陣痛既媽媽比較建議開刀。
咁公立有冇得開刀呢。係有既，但冇得話想開刀就開刀。係需要開刀時先會安排開刀（例如，媽媽曾經有兩次開刀經驗、胎位不正、胎兒過大等等）。如果身體健康又想開刀既媽媽就需要去私家啦。
作者 : 黃詠助產士